2 On ya Track

Haaalloooo, mir sitzed da in Koh Phayam (Thailand), wo mir au bis am Schluss na werdet bliebe, und wartet bis mier hei MUEND. Ja, muend, will mir sind fascht total pleite 😀 Aber so muesses ja au sii.

Die letzt Ziit isch e schoeni, friedlichi Ziit xi. Meer und Gnuesse wuer eigendli lange als Beschrieb.

Tioman isch eifach nu en Traum xi. Hend en platz becho im beliebte Bamboo Hill Chalets. Hend es Privatchalet gha, am Hang mitere riese grosse Veranda undere wahnsinnss Ussicht ufs Meer use. Esse isch sehr eintoenig xii, aber defur hets die ganz Atmosphere wieder wett gmacht. haaaaaach *trauem*, Tioman isch nu zempfehle!

Mite einte Koerperhelfti voll bruun und de ander Koerperhelfti voll gschellt (meeeega gschellt hemmer eus!), simmer nach 7 wunderschoene Taeg nach Bangkok gfloge, womer de Clautsch denn troffe hend, zum na adeee choene sege, bevor er am Abig denn wiiter nach Australie gfloge isch. Hend chli Shopping gmacht und fein gesse und mir sind denn am Abig uf de Nachtbus wiiter nach Koh Phayam (die Insle womer ja schomal xii sind). Hend eus so gfroit ufs Vijit Bungalow, womer ja au scho xi sind. Doch womer am Morge acho sind, hets gar noed offe gha und kain Mensch isch ume xii.  Obwohl mer ja per Telefon reserviert hend. Toll! Zum glueck hets nebedra es anders Resort wo s ganze Jahr offe het.

Ja und da simmer ez, wie bereits gschriebe, sit 2 Wuche. Es isch so gemuetlich da, dassmer bis am Schluss bliebet.  Es isch so nebedbii eis vode schoenste Resorts vode Insle, womer eus suesch nidmal im Traum leiste choentet. Doch es isch low season und es git die schoene low season Rabatt. Dur das, dasmer solang bliebet het eus de Bsitzer en special Priis gmacht. So simmer da, hend s schoenste Bungalow vom ganze Resort mit Meeresblick verstaht sich, sind die einzige Gaest und s Wetter isch phantastisch. Ab und zue gits Rege, aber das macht ja nuet. Haha, vorallem Regesaison. Und ja, mir hend de ganzi Strand fuer eus aellei :-), herrlich!

Na 2 Wuche und mir sind wieder zrugg… S waer doch echli gloge wemmer wueret schriebe dasmer eus extrem froied… Die unreal Welt da isch halt scho viel agnehmer.

Doch uf Familie und Fruende froiemer eus ganz klar. Nach 10 Moenet vermisstmer scho die eint oder ander Person.

Die letzte 4 Tage werdemer na in Bangkok verbringe und a lot of shopping mache.  Also wer sich na schnell bi eus wott fett iischleime, damit mer souvenirs mitnehmet, nu zue 😀

… bis bald…
Update Fotos: Tioman, BKK 3, Koh Phayam 3

Namal hend mers fuer laengeri Ziit noed gschafft zum de Blog aktuell z halte und fuer das muend mer eus glich na entschuldige. Sind halt ebe doch au nu Mensche und sind halt au bitz Lazy worde i dere Ziit da.
Ja guet…mir sind doch au scho wieder es Stueckli wiiter cho und hend doch au wieder s eint oder andere erlaebt.
Sind im schoene Lueang Nam Tha in Laos gsi und sind dete chli mit em Roller go umekurve und eus die schoen Landschaft go aluege. Eigentlich hend mer na woelle go wandere in Jungel, aber fuer das haet d Ziit nuemme glanget, wel mer churz vor em Wasserfescht hend woelle in Chiang Mai si.
S Wasserfescht in Chiang Mai isch es riesigs Erlaebnis gsi. Oebs dusse Raegnet oder d Sunne schiint, scheissegal. Chunsch kein Meter troche vorah 😛 .
Die ganz Stadt isch i Partyluune, mega usglasse und gluecklich. Mer sind denn ein ganze Monaet in Chiang Mai blibe, d Ziit isch irgendwie eifach schnell vergange und Chiang Mai haet eus au guet gfalle und mer hend es mega gemuetlichs Guesthouse gfunde.
Ja und denn hend mer eus entschide, dases warschindli s beschte waeri wieder uf Malaysia z fluege, wel dete grad d Hochsaison afangt und in Thailand langsam  d raining season chunt.
So hend mer eus en Flug gnah und sind wieder nach KL gfloge wo de Toby denn scho gad a Windpocke erchrankt isch :-S . Dank „Mahe und Paos“ (Eltern Toby, raetselhafti Naeme 😛 ) hend mer denn die noed so agnehme Taeg vo de Chrankheit choene imene guete Hotel verbringe und hend noed muesse i eusem Chellerzimmer im Backpacker schmore. DANKE VIELMAL NAMAL FUERS HOTEL!!!!!
I dene Chrankheitstaeg hend mer eus den au entschide uf Borneo z fluege.

Acho in Kota Kinabalu hend mer euses Hostel bezoge wo mer i de noegschte 2 Wuche 4 mal wieder anegange sind. Mega fruendlichi und hilfsbereiti Luet wo dete schaffed. Echt numme z empfehle.
Eigentlich hend mer zerscht gar noed gnau gwuesst was mer so wennd mache in Borneo. Hend ja scho lang mal gseit, das mer uf de Mount Kinabalu wennd wenn mer mal dete sind und hend gseh, das es einigi schoeni Inslene haet, aber suesch hend mer noed son Plan gha.
Hend eus denn alles durch de Chopf gah lah und entschide, das mer zerscht mal uf e Rollertour in Oschte wennd, denn uf de Berg und denn na uf e Insle go eus vom Berg z erhole.
Gesagt getan, sind mer gange go alles bueche und en Roller go miete. Nachdem mer eus denn au na mit chli wintertaugliche Chleider ideckt haend sind mer mit em Roller ab richtig Oschte nach Sandakan.
Sandakan isch e mega graui Stadt. S einzig was einigermasse asehlich isch isch s neue Viertel wos baue hend grad am Meer. Dete haet mer au mega fein choene aesse, was mer natuerlich usgnutzt hend.
Sind denn a eim Tag go d Orang-Utan fueterig im Sanctuary in Sepilok go luege. Isch na haerzig gsi, aber halt au scho eingigi Luet wo dete am zueluege gsi sind. Vielicht hetted mer noed amene Sunntig soelle gah. Sind halt au viel iheimischi underwaegs.

Im Internet hend mer na vonere Insle glaese: „Turtel Island“. Seg e wunderschoeni Insle 1h mit em Boot vo Sandakan entfernt wos i sognannte Hacheries tuend Schidkrote halte bis us de Eier schluepfed. Uebernachte tuesch au dete und am Abig chasch Schildkrote bim Eier lege zueluege und auna wies die gschluepfte is Meer freiloend.
Sind am Morge an Hafe und hend eus es Ticket kauft und sind scho 3h spoeter det usse gsi.
Zerscht chunsch mal es Briefing ueber mit de do’s und dont’s uf de Insel und wie de Ziitplan usgseht bis mer am noegschte Morge wieder ufs Feschtland zruggaht. Nachher go Zimmer bezieh und ab an Strand. Sind leider gad bitzeli enttosche worde. De Strand isch noed so wahsinn gsi wie alli gseit haend und es haet 10000 Sandflies gha, so das wennd stahblibe bsich d Fuess scho fascht schwarz gsi sind. Naja.
Es isch Abig worde und mer sind zum Znacht und denn isch s lange warte cho. Mer haet nuemme zrugdoerfe is Zimmer und au nuem an Strand waege de Schildkrote. Am halb 11i isch es denn so wiit gsi und mer sind alli an Strand. Dete hend sich denn knapp 40! Luet uf die Schidkrot ufgstellt und hend daere bim Eierlege zueglueget. Zum
glueck hend sich aber wenigschtens fascht! alli ad Reglig ghalte noed blitze z doerfe.
Noegschte Stop Schildkrote freilah am Strand. Da sind eus die Luet (die meischte scho irgendwie 50i oder aelter) wie chlini Chind vorcho. De Ranger haet gseit mer soelli kei Taschelampe amache, wel die chline suesch i die falsch
richtig laufed, wieder de Strand duruf. D Luet haend sich druckt und gmacht und de Abstand zu de Schildkrote noed ighalte und denn au agfange Liecht mache, wels halt na es Foti brucht haend und em Ranger sini Lampe noed glanget haet. AAARRGGGHHH…NERV!!!
Sind denn froh gsi wo mer am noegschte Tag wieder zrug ufem Feschtland gsi sind. Nu dete haet denn au d Rueckfahrt nach Kota Kinabalu uf eus gwartet. Astrengendi 8h spoeter sind mer wieder i eusem Guesthouse gsi und hend eus parat gmacht fuer de Ufstieg uf de Berg.

Am fruehe morge sind mer abgholt worde vo eusem Taxi wo eus zum Parkigang knapp 100km vo KK gfahre haet. Dete isch eus en Guide zueteilt worde, hend es Fresspacket becho und denn isch es au scho losgange.
De Weg haet einigi astrengendi Stelle und ab und zue muesch scho chli fescht schnuufe, aber d Umgebig laht das scho fascht vergaesse. Wuenderschoeni 6km gahts durch Jungel und Felse bis uf 3300m ufe zu de Zwueschestation
Laban Rata wo au d Underkunft fuer d Nacht staht.
Em Toby isch es wo mer dobe acho sind noed so guet gange. Chopfweh, truemmelig, schlecht…
sind denn nach em Esse bald mal go schlafe. Noed lang spoeter isch denn d French verwachet und haet sich au nuem guet gfuehlt. Die churz Nacht (am 2i haet mer wieder muesse uf de Matte stah) isch darum fuer beidi chli de Horror worde.
Sind denn mit eusem Guide go rede wo eus denn gseit haet, dass das Hoehechrankheit isch und das es wohl noed guet waeri wiieter ufezgha. Hoehechrankheit..super und das bi eus wo us de Schwiiz choemed, em Land vo de Baerge :-S . Hends mega schaad gfunde, aber waer warschindli noed guet gsi na wiiter ufezgah. Das cha ungueti Folge ha (–> Wiki wenns interessiert).
Hend denn aber au us de Huette use en schoene Sunneufgange erlaebt.
De Abewaeg isch denn weniger astrengend gsi und au schneller vorcho. Numme gaege de Schluss haend denn eusi Bei nuemme woelle mitmache. Sind denn froh gsi wo mer zrug gsi sind i eusem Hostel. Hend eus aber au dete scho wieder
muesse fuer de noegschti Tag parat mache. Ab nach Mantanani Island.

Wieder frueh und mit schmerze i de Bei sind mer mit em Bus und Boot nach Mantanani Island gfahre worde wo mer eus fuer 5 Naecht es Bungalow gmietet haend.
Sind denn aber gad mal scho wieder bitz enttuescht gsi wo mer de Strand (…wo isch de Strand?) gseh haend. Alles volle mit Baumstaemm. Fascht kei Platz zum haenge. Na ja. S beschte au versueche us daem z mache.
Wo mer denn i de 2. Nacht e Ratte im Zimmer (uf 3 Meter hoechi) gha hend ischs gnueg gsi und mer hend entschide, das mer das fruehziitig abbreche wennd und zrug ufs Feschtland waend.
So sind mer wieder i euse Hostel in Kota Kinabalu zrug. 3 Taeg hend mer na muesse waerte bis euse Flug zrug nach KL gange isch.

Etzt sind mer wieder in KL, was eus ziemlich achotzt. Sind recht spat am KL Sentral Bahnhof acho mit em Bus vom Airport. Denn muesch der da es Taxi Ticket hohle wod gad meusch Zahle und denn em Driver chasch s Zetteli abgaeh…De erscht fahrer haet wo mer abgfahre sind na gseit mer muessed ihm na en Zueschlag zahle fuer euses Gepaeck (isch eigetnlich scho normal, aber wennd der es Ticket holsch isch das andersch) und also sind mer nach 200m wieder usgstige und hend de noegscht gnah. Dae haet eus denn noed woelle bis a euses Ziel fahre und haet em Toby denn na fascht eis uf de Grind gaeh wel dae sich zur wehr gsezt ahet. Tja..kuhl kuhl.
Eusi Paess hend mer au scho uf d Thai Embassy bracht. Die hohled mer denn wieder ab wenn mer vo Tioman zrug choemd.

Ines paar Taeg gahts nach Tioman Island im Suedoschte vo Malaysia. Mal luege was eus dete erwartet. Mer hend uf jedefall scho chli erwartige a die Insle, isch naemlich mal zu einere vo de 5 schoenschte Inslene uf de Waelt gwaehlt worde.
Eusen Flug zrug nach Thailand haend mer au scho buechet. Am 20.6. Denn traeffed mer au na de Clautsch wo nachher uf Australie gaht. Freued eus huere das mer en so na choend gseh 🙂

Foti Update:
– Luang Nam Tha Valley
– Chiang Mai
– Kuala Lumpur 2
– Borneo (Rollertour, Turtel Island, Mt. Kinabalu, Mantanani)

Unten:
Gsammtcharte vo eusere bisherige Route.  Zum besser gseh inezoome. D date sind noed immer richtig, aber das isch ja egal.

Mer hend e grossi Odyssee hinder eus wo vo Bangkok (wo mer d Heidi und de Oeski fuer es paar taeg hend doerfe begruesse…DANKE NAMAL VO HERZE FUER ALLES!!!! ISCH MEGA GSI MIT EU!!!!!!!….und au de Dorian und d Ivana) ueber Trat (na gschnell uf Ko Mak, Insle under Koh Chang) nach Sihanoukville gange isch, wo mer denn 1 Wuche umeghaengt sind…Wiiter nach Phnom Penh wo mer Toebe, Stephi und de Choel wieder troffen hend und mer erfahre hend das de Nico innere Wuche chunt…Sind mer allei wiiter in Angkor Wat und Siem Reap…zrug nach Phnom Penh zum de Nico abhole und wiiter nach Kratie und denn ueber d Grenze ufd 4000 Islands (Si Phan Don) wo mer e hammer Ziit verbracht hend…zume churze zwueschehalt wiiter nach Pakse (und em Tempel Wat Phu wo Wahnsinn gsi isch, so Alti Ruinene…aelter we de Angkor Wat) und denn nach Tha Khaek wo mer e 2 Taeg Rollertour gmacht hend (Brrrrrr…Rege..Chalt…aber geili Hoehli) zum d Kong Lor Hoeli choene go aluege (Fantastic!!!!)…Nachher 9h wiiter nach Vientiane Hauptstadt vo Laos, wo mer denn eusen Visa Run hend muesse mache ueber d Friendship Bridge nach Thailand und zrug und en Tag spoeter hend muesse uf em Thai Konsulat euses Visa go mache lah (suesch chunsch numme 15 Taeg ueber Land ueber) und chli go umelaufe zum meeega geils Esse z finde….namal 9h wiiter in Norde ufe uf Luang Prabang wo mer etzt sind und morn wiiter goend nach 2 Wuche…Haet eus meeega guet gfalle, isch e wahnsinns Stadt….meega relaxt…haet eus wieder mal guet tah 🙂 .

So das isch de Reisemarathon gsi 😛 …Laht sich schneller lese wiener gmacht gsi isch, aber es isch so viel passiert und Ziit vergange sit em letschte Iitrag, wenn mer wuered afange usfuehrlich werde, weaers scho fascht en Lonely Planet Nr.2 😛 !!

Morn Gahts wiiter richtig Norde nach Luang Namtha (namal 9h..ufff) wo mer denn eigentlich planet chli go wandere z gha…hahaha…numme s Wetter (heissts) soett noed so rosig waerde i de noegschte Taeg und darum lueged mer mal was da drus wird.

Mer lueged das mer s noegscht mal chli schneller wieder e Meldig gebed, daemits da noed so langi Pausene dezwuesched git…aber mer denked ihr alli choends verstah, das mer eifach chli zfuul wird nachemne Ziitli 😛

Bis Bald…..Enjoy the Pictures

—  Bangkok 2, Sihanoukville, Phnom Penh 1
——> Bilder Dorian (Bangkok 2 bis Phnom Penh 1)
—  Siem Reap & Angkor Wat
—  Phnom Penh 2, Kratie, 4000 Islands
—  Pakse, Tha Khaek, Rollertour (Kong Lor Cave)
—  Vientiane, Luang Prabang

Nach 10 mega relaxti Taeg uf Koh Phayam simmer mitem Nachtbus nach Bangkok greist, womer denn doet am Morge de Toebe und d Steffi troffe hend, i eusere super Unterkunft fuer 5 Franke pro Zimmer. Am noechste Tag sind denn au de Choehl und de Sagi in BKK aacho und so hemmer 3 Taeg verbracht mit chli sightseeing, feinem Esse und natuerli de Kao San Road. Mir 2 sind denn richtig Norde greist uf Pak Chong und sind doet de Khao Yai Nationalpark go aluege. Gseh hemmer noed viel. Hend eus en Roller gmietet und sind en Tag lang doet umegfahre. Besser me macht e trekking tour, doch vo dene hemmer doet nu Schrott gfunde und somit hemmer gfunde, mir lueget das ganze selber ah. De Park isch noed de Wahnsinn. Soett ja anschiienend 300 Elephante ha, doch vo dene hemmer nu tonnewiis Baby-chopf-grossi Boellene gseh. Sind au chli in Jungle ie, doch chli respekt isch ume gsi, da ja doet au Tiger und Leoparde usw umeschliichet.

So simmer nach 2 Tag wieder zrugg nach BKK zu de Valeria wo doet in Bangkapi i sonere appartment Aalag gwohnt het, mit pool. Billigi Zimmer… und ebe en pool. Hemmer denkt verbringemer doch eusi restliche 6 Taeg, bis mer ja denn eh wider in BKK muend sii doet am pool. Doch abgseh dases eigendli es Stundehotel gsii isch und au noed wueki nice, het eus na de Bsitzer vom Hotel in Koh Phayam aagluete und gseit es hegi wieder platz im Resort, zudem gad au na es beachfront bungalow. Da isch ja wohl de Fall klar gsii und mir hend na am gliche Morge euses Zueg packt, uscheckt und sind am Abig uf de Nachtbus. Wieso au noed wieder am gliiche Ort zrugg, wenns eus ja doet sooooo guet gfalle het. Das isch au die bescht Entscheidig gsii, will again, hemmer wider wunderscohoeni Taeg verbracht mit wieder s beschti Thaiesse. S Wetter haet leider noed wueki mitgspielt, het eigendli so guet wie nu gregnet und Bewoelkt is immer gsii. Aber eeeegal, trotzdem  super gsii!!! Und zum nameh bruun werde hemmer ja na 6 Moenet de Ziit haha 😀

Huet, de 31. goemmer zrugg nach BKK und froied eus jetzt mal uf es bequems Bett, da d Eltere vom Toby so grosszuegig sind und eus doch grad fuer die Taeg wo sie au in BKK sind es Hotel zahlet,  wuessed scho gar nuemm wie sich das aafuehlt. Und natuerli froiemer eus au uf de moessio Dorian und de Eltere vom Toby 🙂 . Juuuuhuuu und bis bald!!!

Update Fotos: Bangkok, Khao Yai Nationalpark, Ko Phayam

PS: D Foeteli laded mer etzt neu ubere Flickr ufe. Das beduetet fuer eu, das Ihr d Foeteli viel gmuetlicher mittels Vorschau choend aluege. Checkeds us 🙂 .

Standort Ko Phayam:

In Georgetown sind mer noed lang blibe. Haet eus beidne gar noed gfalle dete. Da haet Melaka na meh haer gaeh. Das isch eigentlich e Stadt wo under em UNESCO Weltkulturerbe staht, aber viel merksch noed devo. D Hueser rotted eifach vor sich hi und findsch sehr wenig haerzigi Orte. Numme wieder mal little India haet wuerkli was haer gaeh…vor allem was s Esse abelangt natuerlich 🙂 .
D Backpacker sind gross und sehr unpersoendlich und d Zimmer total uebertueret. D Stadt isch gfuellt vo Touris aber die meischte nutzeds eifach zum schnell 2 Taeg blibe und sich es 60 day Visa fuer Thailand z hole. Genau so hends au mir gmacht.
Mer sind denn am Morge frueh mit em Minibus wiiter ueber die thailaendisch Grenze. Obe am Zoll es rise Plakat gsi wo gstande isch „We welcome you with our smile“. Die Zollbeamte sind denn aber gar noed am laechle gsi, sondern haend d Haend verworfe und sind andersch unfruendlich gsi wo mer uf de arrival card noed e Adresse vo Thailand itreit hend. Halt schnell was anekritzlet und denn sinds z fride gsi. Aber ehrlichgseit… Thailand het voll beschisse aagfange!!! Ebe zerst de Zoll, die Zollbeamte hend echt s gfuehl die waehrets. Ja und denn isch echt s unglaubliche passiert… Hend in Hat Yai (d Grenzstadt vO Thailand) muesse Minibus wechsle. Hend au en neue Fahrer becho. Jedefalls hemmer de am Mittag naimets ghallte zum Zmittag esse. Wo d French ussgstiege isch, isch de Fahrer i sie iegloffe, sie het ihm aber kei Platz gmacht, well er sie ziemli gschupft het. Da dreiht er sich um und tritt ihre voll eis in Arsch, noed nu bizli, sondern huere fescht, sonen Kick. Ich ha das alles beobachte well ich nach ihre ussgstiege bin. Sie haets echt nuemm gseh, well sind jensti iheimischi Luet doet gstande wos gseh hend und die iheimische Manne sind nurna am lache gsii und d Fraue hend nuet gseit und de Chopf sozaege wegdreit. D French het ihn aagschroue was das soell, aber de Typ isch huere agressiv gsii uf sie, het au namal uf sie los welle. Ich hanen huere aagschroue und ploetzlich packt er e Knarre usem Auto use und richtet sie ufd French. Ich ha grad gseh dases e Spielzuegknarre isch, d French jedoch het zerst gmeint die segi echt und het sich scho tot xeh… Sones Arsch, und denn hetter aagfange mit dere „umeschuesse“ und het so selber Schuss-gruesch gmacht.
Ich hanen denn schlussendli packt und ihm e richtig fetti Fust id fressi verpasst. Er isch ziemli perplex gsii, will er das noed erwartet het dass sich oepper wehrt. Schlussendli is em nuna unagnehm gsii und isch nuna umegloffe und die ganz Ziit sorry sorry gseit. Ja fuer d French isch de Tag wohl gloffe gsii und Thailand het eus gad beidi total aapisst. Doch de Lauf der Dinge hets sich denn am noechste Tag schlagartig kehrt, womer in Koh Phayam aacho sind…

Acho da im Ressort haets eus gad mal ziemlich umghaue, vor allem darum, wel de erscht Idruck vo de Insle nach de Akunft gar noed so guet gsi isch…
Wahnsinnig schoen. D Bungalows sehr simpel, aber mega gedige. Hend leider keis a de Beachfront becho, aber euses i de 2. Reihe haet glich zwuesched de andere Bungalows duregseh. Am morge usem Fenschter glich direkt s Meer und de Strand gseh 🙂 .
Z mache gaeh haets noed viel uf dere Insle. Mer hend eus da echt wiedermal Ziit gnah zum eifach bitz usspanne und bruun werde.

Tagesablauf:
9.00  ufstah und chli am Strand bi Ebbe go umelaufe
10.00 Dicke, dicke Zmorge go inehaue vo Englishbreakfast, Roesti bis Curry 😛
bsi irgendwenn mal chli ad Sunneligge und chli Bade
18.00 Znacht und denn na de Abig mit emne Bierli oder e bitz Thai Whisky usklinge lah

Etzt isch gad eusen letschte Tag da, i 1h fahred mer mit de Ferry vo da ab und denn gahts ab nach Bangkok wo mer denn morn Morge am 6i werded acho. Am 18. Choemed ja denn de Koehl und de Sagi ah und die wennd mer scho go empfange mit em Toebe und de Steffi.
De Abschied fallt eus wieder mal sehr schwer. Isch so mega schoen gsi da und s Esse wo mer eus zu genuege inegahaue hend isch de Wahnsinn gsi.
Tja…noegschtmal wieder 😛

Bis bald und viel spass bim fruere i de Schwiiz..hahaha!!

Update Fotos: Gerogetown bis Ko Phayam

Flug nach KL hend mer guet ueberstande und sind erscht mal gspanne gsi uf Malaysia.
Uf em Weg vom Flughafe id Stadt ine hend mer mega viel Reihehueser gseh, noed so wie mir das kenned…Immene Quartier wo so gross isch wie ganz Hettlinge, isch jedes Huus genau nach em gliche Schema bauet worde. Schraegi sach.
Wo mer id Stadt gfahre sind, hend mer eus huere gfreut chli go umelaufe und d Stadt chli z gshe, aber hend denn ziemlich schnell muesse merke, das de Kulturschock nach 3 Moenet Indonesie wieder ine moderneri Welt iezcho, ziemlich stark isch. So haets eus denn scho nach churzem abgloescht.
Mer choenti eigentlich meine mer segi in Singapore wenn mer d Stadt so alueget. Hochhueser, moderni Shoppingcenter und ziemlich suber. Echt gad uehberhaupt noed das wo mer suechet.
Hend aber denn doch entschiede 2 Naecht z bliibe, das mer wenigschtens na bitzeli was gsehnd und na uf d Petronas-Tower choend ufegah, was naebedbi au e Enttueschig gsi isch. 3h astah fuer 15min vo de Mittelplatform choene in Raege usezluege 🙁 .

Wiitergange isches nach Melaka. Das isch e Stadt wo s Zentrum es Unesco Weltkulturerbe isch. Hend dete us Glueck es super Hostel gfunde. Sind det anegschickt worde, das Hostel het aber erscht 2 Taeg spoeter ufgmacht. Trotzdem sind mer empfange worde und hend es tip-top neus Zimmer choene beziehe wo na nie oeppert drinne gschlafe haet 😛 .
Well mer eus recht wohl gfuehlt hend und na us es paar anderne Umstaend, sind mer denn au da laenger we planet, naemlich 10 Taeg, blibe.
Haet meega feins Esse gaeh dete und hend eus endlich au mal selber was im Hostel choene choche, hend Herd und alles dete gha.

Etzt sind mer in Georgetown (Penang, Malaysia) emne wiitere Weltkulturerbe und werded uebermorn d Grenze nach Thailand ueberqueere.
Leider hend mer d Oschtkueschte vo de Malaysische Halbinsle ganz muesse weglah, wel dete grad Monsunziit isch und so anschinend huere viel Hostels zue hend unds denn wuerkli amigs de ganz Tag pisst.
Tja. S noegscht mal denn…

So…s noegscht mal ghoered Ihr eus denn us Thailand. Det gahts zerscht mal wieder chli uf e Insle go haenge und denn irgendwenn wiiter nach Bangkok. Wo mer denn so Endi Januar werded acho.

Update Fotos: Kuala Lumpur – Melaka

Irgendwenn Afangs November am spaate  Abig simmer in Bali aacho. Die beruehemt Insle, endli au mal da! 1. Destination Ubud.

Aagfange hets, normal, mitme chliine Problem…. am 12i am Abig findsch eifach kei Homestay, alli sind zue, rsp. d Bsitzer sind scho am schlafe. So isch eus nix anders uebrig bliiebe als ines Hotel z gha und wills doet nu na d Honeymoon-Suite frei gha hend, die z neh 😀 Fuer 50 Franke ( hend na 30% Rabatt uebercho weg defekti Duschi, wo aber nachher wieder tip top gloffe isch) puure Luxus!

Ubud isch recht herzig, zwar sehr touristisch, aber strahlt en gwuesse Charm uus. Viel kuenstlerisches z bewundere, vo typische Skulpture bis Bilder, jensti Gallerie und viel Laedeli zum shoppe… nur leider viiiiel ztuuer. S bescht isch aber de Monkey Forrest gsii. Laufsch umenand und ueberall hets Affe wo de Menschekontakt extrem suechet.

Nachmne churze bsuech in Lovina und em Pulau Besaki (Mothertempel), simmer wieder zrugg nach Ubud. Natuerli hemmer doet Spanferkel gesse a la balinese art.

Wiiter is ufd Gili island ( Insle Gruppe wo zu Lombok ghoert) . Eusi Wahl: Gili Air. Die chlinsti vode 3 Inslene. Gili Trawangan isch e Party Insle, nei danke, Gili Meno isch tuer und eher fuer „elteri Luet“, au nei und Gili Air vermischt das ganze: ruhig, aber trotzdem Lebe. Hend denkt bliebet da mal paar Taeg… Sind schlussendli ganzi 2 Wuche bliebe und waeret au laenger bliebe. Mir hend euses Paradies gfunde gha. Mega schoeni Insle, i 90min chamer rundume laufe, schoeni einsami Straend, fasch kei Touris und es wunderschoens Bungalow am Strand.  Die Iheimische, au i eusem Alter, sind eifach de hammer. Sie hend nuet, defuer wohl de luschtigst Humor wos nu git.

Am 23. November hemmer d Gilis schwerenherzens verlah und sind nach Mataram ( Lombok ), womer de Toebe und d Steffi troffe hend. Sind den vo doet per Bus und Ferry nach Flores greist. In Flores simmer noed lang bliebe, mue sich meh Ziit neh und die hemmer leider nuemm gha wegem Visa. Hend denn en 2 Tages Boot-Trip uf Komodo- , und Rinca-Island gmacht. Isch super gsii dene Komodowarane oeppe 3Meter devor zstah. Hend au viel anderi Wildtier gseh und hend je 2 mal 2 Stunde trekking gmacht. Hend choene go schnorchle und baedele und hend natuerli ufm deck vom Boot gschlafe. Ab Flores hemmer eus die muehsam Reis zrugg nach Lombok nuemm welle aatue. So hemmer wohl de beschti Weg gwaehlt gha. Per Boot. 4 Taeg und 3 Naecht ufm Boot. Jede Tag frische Fisch und s beschti Esse. Aghalte a ungefaehr 15 Ort, vo schoene Schnorchelplaetz bis einsame Inslene.

In Lombok acho hemmer 2 Roller gmietet und sind richtig Rinjani gfahre. Me mue erwaehne das Bali nuet geg Lombok isch was Natur und vorallem d Riisterassene betrifft. S isch eifach nu wunderschoen.  3 Taeg unterwegs ide Chaelti, aber het sich sehr glohnt. Nachere Nacht in Mataram sind mir 2 allei wiiter greist. Hend eus namal en Roller gmietet und hend de Suede erkundet. Und wieder, die schoenst Natur.  In Kuta ( Lombok) simmer einigi Taeg bliebe und hend eus jede Morge fuer 8 Franke!! haha, en Zmorgebuffet goennt im Novotel-Resort. Vo Chaes, bis Gipfeli und was alles na dezueghoert, het alles gha und mir hend so Aesse eifach wieder mal bruucht, nach 2 Wuche fasch nu Nasi Goreng und co. =)

Eusi letzte Taeg Indonesie hemmer in Bali verbracht. Zerst es paar Taeg in Padangbai und die letzte 5 in Denpasar.

Am 21. Dezember hets denn gheisse: bye bye Indonesia and thanx a loooot for this amazing time!!! Indonesie isch de wahnsinn! Hend das Land, d Kultur und Mensche huere fescht is Herz gschlosse.

Update Fotos:

–> Bali
–> Gili (-Air) Island
–> Flores, Boattrip, Komodo, Rinca
–> Lombok

Am Dunnstig Morge am 8i simmer miteme 9er Minibus richtig Mount Bromo gfahre. Im Bus, 3 Spanier, 3 Italos ( mitem einte han ich (French) na gstritte, son richtige bloedmann gsii, wo sgfuehl gha het er choeni dumm tue und mir all schand uf italienisch sege, natuerli heter noed gwuesst dasi italienisch chan und denn isch gad mal e ladig Fluechwoerter vo mir zrugg cho 🙂 und am Schluss hanen eifach nume na uusglachet). Aber susch isch die 12 Stundigi Busfahrt ganz oke verlaufe. Bequemi Sitz, gnueg Platz – mir hend 3 Sitz fuer eus gha und das het ebe dem Herr Italo gaar noed passt :-p – sogar de Umstaendentsrpechends guets Restaurant ufm Weg – mal kei Padangfood – und kei 10000 Pausene ufm Weg.

Zerst simmer nach Probolinggo (1 Std vor Cianjur Lawang, wo alli Hotels sind und de Weg richtig Mount Bromo aafangt), womer bim Agency office aaghalte hend. Tip top und seeehr organisiert – sind ziemli ueberrascht gsii – hends eus Tour vom morgige Tag erchlaert und eus gad na e Mitfahrglegeheit nach Bali abotte.

In Cianjur Lawang aacho hemmer nuemme choene vor lache, alli Iiheimische dick iipackt mit Deckene, Chappene, Haendsche, Daunejacke, wueki allem moegliche… will isch halt „nur“ 10 Grad gsii. Nachmne Bier und eme extrem gruusige Nasi Goreng simmer i eusem Chalet-style Hotel bald mal go schlafe – will wake up time 3.30 AM.

Am Morge womer am 4i vomne Jeep abgholt worde sind hetts den aber au eus gfroore: knappi Minus Grad!!! Simmer eus doch nuemme gwoehnt! Fuer Sunrise simmer zerst zum View Point gfahre worde, will vo doet het mer eifach die schoenst sicht uf alli Kraterberge. 1 Stund holpprigi fahrt, doet obe aacho hets eus wiedermal d Sprach verschlage ( ok, zerst mal es nerve weg de viele Touris wo sich ueberall wennd fueredraengle und eim eifach wegschupfet…. haaaach wie eifacher is doch gsii wo mir nur unter Iiheimische na gsii sind) – vor eus i beschter Sicht die 3 Vulkaen: Bromo wo ja voll aktiv und am rauche isch, de Batok und Semeru. Sicht links unedra isch s chline Oertli gsii womer gschlafe hend und rundume eifach nuet. Und das alles iikleidet imne Nebelbeet. Namal links uebere het mer langsam d Sunne gseh. Mit de Wulche und de Farbe wos dur de Sunneufgang geh haet, het das ganze wie imne Bilderbuech usgseh, eifach wunderschoen! Mir wared gern na laenger doet obe bliiebe, doch wod Sunne denn scho recht dobe gsii isch hemmer den dflucht ergriffe, zu viel Touris wo die schoen Atmosphaere versaut hend.

Mitem Jeep is den wiiter gange zum Mount Bromo, wo jeeensti Iiheimischi mit Roesser druf gwartet hend zum Touris fuer viel Geld bis ad Stege vom Bromo zqutschiere. Eifach zviel mit dene Roesser, die meiste wo de Service  in Aspruch gnoh hend sind d Chinese gsii. Sooo luschtig gsii dene zuezluege. Mir sind natuerli alles gloffe und dank Raucherlunge isch das ganze au noed so easy gsii. Doch d Astraengig het sich ufallfaell glohnt. Sobald mer ufm Bromo isch und abe id wiiti luegt, choend mer scho fasch meine me isch ufm Mond. Zumindest gsehts us wie d Bilder womer vom Mond kennt, wuerkli sehr selte es bitzeli gruen.

Me chan au obe rundume laufe, brucht oeppe 45 minute. Leider het eus dadefuer d Ziit noed glanget. Doch s isch au nume Idruecklich zum eifach ufmne Vulkanberg choene haenge, id wiiti luege und sgseh wie de Rauch usem Erdloch use stroemt und wies au toent….. oeppe wenes Flugzueg wo grad obe nachem Start a eim verbii fluegt.

Geg die 8i am Morge simmer zruggfahre zum Hotel wos de ueblichi Zmorge geh het: entweder fried rice or noodles oder Toast with strawberry jam ohne butter! hmmmmmmmmm 😉 Toast natuerli noed wueki toastet und de Kaffi mit meh Kaffisatz als suscht was.

En Minibus het eus ca. 1 Stund spoeter abgholt und endli is wiiter gange nach Bali!!! –> 9 Stund fahrt bis zude ferry; fuer indonesiche Distanze en Chatzesprung.

Update Pics –> Mount Bromo

So. Yogyakarta hend mer etzt au erlebt und d Ziit da neig sich am Endi zue. Aber zerscht mal na eusi Erlebnis wo mer da gmacht hend.

Mer hend eus numme guets saege lah vo Yogya (Churzform vo Yogyakarta). Segi weniger stressig als Jakarta, heg gedigeni luet, choensch geil esse und choensch sogar Velofahre (Ja, das isch scho fascht chli es wunder bi dem Verkehr wo mer bis etzt erlebt hend. Ruepel die Fahrer vo motorisierte Fahrzueg 😛 ).
Und echt. Stieged mer usem Zug da us und es chunt niemert und stresst di mit „Taxi“ oder suesch was. Eher di Iheimische sind agsproche worde. Numme de eint oder ander Velotaxifahrer isch chli hartnaeckig gsi.
Ab is Hotel, isch ja au scho wieder chli spoeter gsi und na churz was feins go esse.

De erschti Tag haet luschtig agfange. Sind mer usem Guesthouse use und hend mega viel luet mit Mundschutz gseh. Na ja, gsehsch na ab und zue eine, wels a de einte Orte halt versmoggt isch. Womer denn imene Kaffi ghocket sind hends eus gseit, das de Merapi wieder usbroche isch und d Esche nach Yogya gwindet worde isch. Soelled besser au Maskene alege. Hend denn je eini gschenkt becho 😛 .  Hend eus denn mal na ueber de Borobodur  (eis vo de 7 Weltwunder) schlau gmacht, aber leider isch dae zue gsi, wel halt de Vulkan Merapi am spucke gsi isch 🙁 !
De rescht vom Tag hend mer wider mal chli usgspannt und halt mal de Blog (isch ja weidermal noetig gsi) fertig gmacht.

Am zweite Tag, mim Gebi, sind mer denn bitzeli da go umenandschliiche, hend eus au a dem Tag noed z viel vorgnah, isch halt Sunntig gsi und alles was so chasch aluege (z.B. Kraton – Sultanpalast, Tamansari – Wassertempel) sind Total ueberloffe und so hend mer das uf de Maentig verschoebe. De Abig isch denn Gebientsprechend feucht-froehlich worde mitere aschluessende Skype Session am 4eri am Morge. Wer Online gsi isch weis vo was mer reded 😛 !

Maentig sind mer denn halt au chli spoeter ufgstande und hend denn leider muesse ghoere, dass de Kraton am 1 zuemacht. So hend mer eus denn Velos gmietet und sind na in Taman Sari. Dete muesch zerscht na durch Maengi chlini mega haerzigi Gaessli laufe wo mega farbefroh sind. Wiedermal e ganz en anderi Welt. Taman Sari isch eigentlich es Schwuembi, gseht mal so us. Aber da ine haet de Sultan dazumals sini Fraue beobachtet und usgwahelt mit welere daser schnell woett is Chammerli verschwinde zum namal en Sohn bzw. e Tochter z zuege.
Sehr schoen und au sehr imposant das ganze.
Hend halt au immer wider gfroeget, oeb de Borobodur vielicht wieder offe isch, aber leider isch d Antwort immer „No“ gsi. Und so hend mer das eigentlich au scho abgschribe gha und entschide, dass mer na zwei Naecht wennd in Yogya bliibe und denn wiiter zum Mount Bromo woend.

Next Day sind mer denn go de Kraton aluege. En Palast wo immer na en Sultan wohnt (isch scho de 10).
Fuer de Rundgang chunsch gad na en Guide ueber wo der das ganze Zeigt. Leider chasch aber noed so frei umelaufe, wel halt meega viel Bode us Italienischem Marmor isch und das hetteds gar noed gern.
S Gebaude selber isch easy, aber haet eus beidi noed so vom Hocker ghaue.
D Usstellige wos gha haet sind meh oder weniger ueber de 9. Sultan. Verzelled vo sinnere Lebensschicht, vo sine Fraue und was au sehr wichtig isch fuer da…vo Batiksache :-S (Batik, Batik, Batik ueberall numme Batik, aber da drueber muend mer fascht scho en separate Iitrag mache 😛 Das isch da e Evergreen Mode…SCHRECKLICH!!!!).
De Momentani Sultan hegi numme ei Frau und segi ziemlich Lieberal (so wie mir das verstande hend) haet 5 Toechter aber leider fuer Ihn haet er Problem zum en Sohn becho.
Anderi Sultaen hend 50 Chind gha 😛 …fliessig, fliesig!!
Im grosse und ganze nuet wo mer unbedingt mues go aluege, aber wers mag.

Sind denn am abig uf e Travel Agency und hend woelle wege emne Minibus drive zum Bromo froege.
Denn hend mer uf de Tafle vo de Verastaltige gseh, das fuer de 6. en Bsuech in Borobodur itreit isch. Komisch hend mer denkt, Borobodur isch doch „closed“ wies eus immer gseit hend.
Zum glueck hend mer namal gfroeget.
Und so hend mer eus gad en Choffeur organisiere lah wo eus am 3:30 am Morge soell go abhole cho.
Sind denn recht spat go schlaafe, so am 12i, wel mer na meega lang im restaurant gha hend. Die hend fascht e Stund gha bis s mal s erschte bracht hend (mega feins restaurant, alles Vegie oder Vegan. Recht alternativ und billig. Hend noed mal 10.- Zahlt fuer beidi. Sitzisch gmuetlich am Bode under emne Bambushuettli).
Am Morge am 3 hett denn eusen Wecker gluetet und mer sind ufgstande. Womer usem Guesthouse usecho sind isch eusen Driver au gad entgegegloffe.
De Himmel haet wunderbar klar usgseh und so hend mer eus au scho uf en super Sunneufgang gfreut. Leider isch es denn ufem Weg immer chli nebliger worde je noecher mer det ane cho sind. Hend eus aber noed devo stoere lah und na ufs beschte ghofft.
1h drive zum Borobodur und dette haesch duren Hoteligang muesse ine (de Itritt isch ziemlich happig gsi…35.- /pers :-S …aber so wends es warschindli bitzeli exqusit halte, daemit noed Schuelklasse mit Riisecars choemed).
Sind denn au gad z 4. (Mir beide, ei anderei visitorin und eine vom Hotel) anegloffe.
De Gang det ane isch eifach numme atemberaubend gsi.  Dunkelheit. De Borobodur vo einige wenige Schiiwoerfer beluechtet, mir numme mit Taschelampene bewaffnet (wo mer nebedbii nachher als Souvenir (?????) hend choene mitneh) det langsam entgegegloffe. Das Riesige Bauwerk isch sehr misterioes im Nebel ighuellt gsi.
De gmuetlichi gang wo mer druf gha hend, de Nebel und d Lampene wo das ganze beluechet hend haet das seeehr speziell erschine lah.
Eus haets glichzitig d Haar am ganze Koerper ufgstellt churz bevor mer unedrah acho sind.
Langsam die viele Stufene vonem ufekletteret immer noecher zu de Kupple cho.
Obe acho haets eus gad mal beidne Wortwoertlich churz de Schnuuf verschlage (noed wege de Stuufene, ganz sicher noed!!).
Stille…Absolute Wahnsinn was das hergit. Immer na isches dunkel und chli neblig gsi. Leider hend mer gseh das na meh Nebel ufzieht, hend eus aber noed stoere lah vo dem, das Erlebnis i dem dueschter, mischterioese Liecht und Nebel isch unvergesslich.
De Hotelagstellti haet eus zeiget wo d Sunne soetti ufgah, falls sie chunt.
Die ganze grosse Gloggeaehnliche Kupplene mit de Buddhas drinne und die freisitzende wo beschune worde sind vom Liecht wo langsam am Horizont cho isch und de Schiiwoerfer hend so ne Energie und Unendlichkeit vo dem Bauwerk usgstrahlet.
Sind langsam mal um die ganz Kupple gloffe und hend alles aglueget es paar Foeteli gmacht und eus vom Moment flashe lah.

Eifach numme es unvergesslichs Spektakel das ganze, choends gar noed gnueg saege.

Churz nachdems denn chli heller worde isch, sind denn na meh Luet cho, wo denn d Stimmig leider broche hend und agfange hend luut mitenand rede und au umenandalufe. Denn isch fuer eus de richtigi Ziitpunkt gsi zum langsam mal di undere Ebene devo azluege.
Sind Ebeni um Ebeni rundumegloffe. Wahnsinnig die ganze Bilder wos da in Stei gmeisslet hend. 1000i vo Gschichte bis hi zu de Erluechtig vom Siddhartha Gauthama (alias Buddha).
Hend jenschti Eidechse i de verschiedenschte Farbe gseh. En Frosch, vo 50cm entfernig, wo denn aber nachemne Ziitli imene grosse Sprung devo isch und en riesige Gekko (30cm lang) wo mer au us de gliche Entfernig hend choene aluege ohni das er abghaue isch.

Nachdem mer dunne gsi sind, hend mer na choene im Hotel en chline Snack esse und denn isch au langsam d Sunne fuerecho und hett eus na en guete Blick so druf beschert.
Luet wo viel nach eus uefcho sind, sind au scho am Tisch gsesse. Hend beidi noed choenne verstah wieso das die das ganze so im Eillauf (sind sicher noed d Ebene go aluege) durchrannt sind.
Vo wiitem hend mer Menschehorde gseh d Staege ufelaufe und sind wahnsinnig froh gsi, das mer eus das gleischtet hend.

Jedem wo da anechunt choend mer das numme empfehle. Das isch oeppis wo eim fuer immer und ewig  wahnsinnig, praechtig und unvergesslich in  Erinnerig wird bliibe!

Mit em Auto sind mer denn nachher na churz bimene wiitere, chlinnere, Tempel go ahalte. Det sind mer aber noed noecher ane, da hett sich sicher de Itritt noed glohnt. Da haet mer vo wiitem gnueg gseh. Nachher sind mer e wunderschoeni Strecki, ueber Riisfelder und durch chlini Doerfer, zrugg nach Yogya gfahre.

Fuer morn am Morge 8.00 hend mer eus scho en Minibus zum Bromo charteret.
Und so werded mer am Fr. Morge au das Spektakel na choene go aluege.  Nachher gahts wiiter nach Bali

Update Pics: Yogyakarta und Borobodur

So..Mer sind wiedermal chli spat drah mit schriibe 😛 .
Hend eusi zit bi de Vippassana Meditation fruehziitig (nach 3 Taeg) abbroche und sind etzt wieder in Jakarta, aber dadezue spoeter.

De Artikel wird ziemlich lang, also noed fruehzitig ufhoere lese. De erschti Teil schriebt de Toby und de zweiti d French.

Wo sind mer stahblibe..ah ja:

Am fruehne Morge (06.00) vom 26. September sind mer vom Martin sinere Flat in Singapore loszoge zum puenktlich zum Check-in am Harbour Front Center in Singapore azcho. Det isch alles rund gloffe und mer hend is Boot nach Sekunpang (Batam, das lieht 45min vor Singapore ghoert aber scho zu Indonesie) choene istige.
D Ueberfahrt isch na cool gsi, gad na chli Singapore Sightseeing choene mache. Zerscht mal um ganz Sentosa umegfahre, wo sich jenschti luet e Fehriewohnig baue loend und lah hend, echt scho ziemlich volle, und denn na d Skyline vo Singapore choene aluege churz nach Sunneufgang.
Acho in Sekunpang und nach erfolgriiche Immigration (Wos der au na gad abdrueck vo de ganze hand gnah hend) hend mer s Ferry-Terminal choene verlah und sind denn churz druf au gad ziemlich ueberrennt worde vo dem Land.
Zig Luet sind cho wo mer zum Pelni (Indonesischi Schifffahrtsgsellschaft) Terminal cho sind. Mr..Mr…Where You go 😀 .
Mir natuerli noed gwuesst wo ane und bi wem Billet chaufe. Also zerscht mal dureschnufe und luege. Denn mal eine gfroeget und erfahre das beidi Ziel wo mer denkt hend choented mer afahre d Schiff scho abfgahre sind und erscht am noechschte Morge wieder eis Fahrt. SCHEISSE!!!
OK. Einzigi Alternative wo in Sumatra glaege isch „Tembilahan“….???? What The Fuck….aber ja eh hend mer denkt…hauptsach mal in Sumatra und denn choend mer scho mal wiiter.
Ticket kauft, 1.5h gwartet denn au das schiff chone bestige. Zum glueck isches easy Wetter gsi und s Boot isch ruhig gfahre. 5 Stund und es paar woerter mitemen Iheimische spoeter sind mer denn dete acho und sind gad mal vo Taxifahrer aller art und sueschtige verchaufer umziglet worde. Mir sind beidi de feschte Meinig, das mer ziemlich di erschte Wisse gsi sind wo die Luet i ihrem Lebe gseh hend. Bisch aglueget worde wie vomene andere Stern. Zum glueck het eus de Iheimischi vom Schiff denn je es Velotaxi organisiert und eus mit dem zum noegschte Minibusterminal gschickt, wels i dere Stadt noed wuerkli es guets Bussystem gaebi wod devo waeg chunsch. Am Terminal sind mer gad mal wider chli ueberforderet gsi und hend eus zerscht mal chli ziit muesse verschaffe zum dureschnuufe und bespreche was mer gnau wennd mache und wo ane das mer wennd. Hend eus denn entschide, das mer nach Padang wennd fahre, wel eus das gad so am beschte dunkt haet als Zielpunkt.
So hend mer eus denn en Minibus charteret und und sind denn run 14h (abfahrt am spaate Namittag) mit dem queer durch ganz Sumatra gfahre, uf em Weg jeeenschti mal muesse ahalte demit de Fahrer wieder was cha go esse oder so.

Uf jedaefall sind mer denn am Morge am 5i in Padang acho, de Minibusfahrer haet eus denn eifach irgendwo usegworfe, wel er die Homestay noed gfunde haet wo mer agaeh hend. So sind mer denn halt na selber am umestolpere gsi. Mega friedlich gsi um die Ziit. Erlebe wied Stadt langsam verwachet.
Mer sind denn eifach durch d Stadt duregloffe und hend denn doch na d Homestay gfunde wo mer hend woelle gah. Isch ebe amene neue Platz wie mer eus denn spoeter hend verzele lah vo de Bsitzerin, s alte Huus segi es Jahr vorher bimene grosse Erdbebe igstuerzt.
Padang isch gmuetlich zum chli umelandlaufe. Haet noed bsunders viel zum gseh und au numme wenigi wiisi umenand, aber das isch ebe cool. Padang isch eigentlich numme es Sprungbrett fuer Surfer wo ufd Mentawai Islands (300km vor de Kueschte vo Sumatra) wennd go Waelleriite.
Mir hend eus natuerlich au ueberleit oeb mer noed au mal det usewennd (uebrigens haends etzt gad en Tsunami det usse gha –stand 27.10–) hend eus denn schlau gmacht, eus das ganze aber namal woelle durch de Chopf gah lah.
Und denn hend mer am Abig bim trinke i de Hoemstay eine kenneglernt wo Surfcharter uf die Inslene use macht und de einzigi isch wo das mitemne Speedboad erledigt und so i knapp 3h det use bisch. Suesch muesch mit so uralte Holkahen fahre wod mind. 10h drufhocksch unds noed klar isch oeps fahred bi chli schlechtem Wetter.
Er haett eus denn es guets agebot gmacht, well er eh haet use muesse go Boards bringe. Am Morge vor em abfahre haet er eus denn gad na en Kolleg vo Ihm vorgstellt wo der usse e Homestay betriebt und somit isch au na gad fuer uebernachtig gsorget gsi.
D Ueberfahrt mit em Skipper, sinnere Crew vo 2 Luet und da 2 Kollege vonem (de eint isch ebe de John, dem wod Homestay ghoert) isch recht ruhig gsi, kei grossi Welle, sind aber glich im hindere Teil vom Boot ghocket, wels vorne recht ghaemmeret haet.
Nach knapp 2.5h sind mer denn bim erschte Punkt acho wo hend muesse Bretter abglade werde und eus haetts gad mal de schnuuf verschlage. Wahnsinnig schoen. Wisse Sandstrand. Keis Hotel wiit und breit. Numme es Boot mit es paar Surfer.
Wo denn d Bretter verlade gsi sind hend mer eus uf de Waeg gmacht richtig Homestay. Das isch halt namal en 2h ride gsi, aber es haet sich glohnt, so hend mer en grosse Teil vo de Kueschte choene gseh. Vorallem isch denn langsam mal d Sunne am undergah gsi und haet alles ines wahnsinnigs spektakel vo epochalem usmaas verwandel. Es haet echt unbeschrieblich usgseh. Und vorallem unberuehrt.
Am Strand vo de Homestay acho hend mer zerscht mal na muesse durchs Wasser waate, wel s Boot halt noed haet chone am Strand alege. Wels halt scho dunkel gsi isch, isch das denn na luschtig gsi, welld noef gwuesst haesch wie tuef s Wasser isch.
Mega gmeuetlichi Homestay. Alles numme us Holz, seg na immer im Ufbau hend mer eus sege lah. Chlini aber gemuetlichi Zimmer. Chuchi zur Allgemeinbenuetzig (Hend selber muesse sache mitbringe und choche) und es paar Iheimischi wo a dem Strand wohned (Iheimischi cha mer scho fascht nuem saege. Git da scho na richtigi Iheimischi, wo i de Waelder lebed, aber die werded leider immer meh umgsidlet dameit s Goverment scho mal Platz fuer d Zuekunft macht. Das wird namelich es „Ferieparadies“ vo de Zuekunft werde…leider 🙁  ).
Am Morge nach em ufstah sind eus den mal zerscht d Auge richtig usm Chopf gheit. BOOOHAAA…So oeppis schoen hend mer beidi na nie gseh. So ne rueh, so Wasser so was vo friedlich… 😀 …jedem wo da id noechi chunt echt wiiter z empfehle!!
Hend eus denn en friedliche Tag gmacht mit chli bade, suennele und chli umelaufe. Leider haesch noed wuerkli wiit id Insle ine choene laufe, wels kei Weg und viel Busch gha haet.
Am Abig hend mer denn leider muesse entscheide, oeb mer na knapp 1 Wuche wend bliibe, oder oeb mer am noegschte Tag wieder mit em Boot wennd zrueg nach Padang.
Mer hend eus denn schweereherzens fuerd Rueckfahrt entschide.
D Rueckfahrt isch Katastrophe gsi. Es haet scho am Morge wo mer ufgstande sind voll abegleert und s Merr haet unruhig usgseh. De Skipper haett denn numme gmeint „This gonna be a nice Ride..“ :-S !!
Uf em Schiff haets denn na meh tah als es vo Land dena gschunne haet. Wasser staendig am spruetze mit em Bug is Wasser ine, Boot knapp vorem Kippe…aber de Sipper haet voll sini Freud gha. Trotzdem sind mer denn nach knapp 3.5h total durchnaesst, aber wohlbehalte im Hafe vo Padang acho.
Nachere wiitere Nacht i de Homestay hend mer eus denn ufgmacht an Lake Maninjau. En See wo meh ad Schwiiz erinneret als mer meint mer segi da i Indoneise, hett echt choene de Lago Maggiore sii. Aber hend da 2 meega gmuetlichi taeg verbracht und eus guet vo dem Hoelleritt uf See chone erhole.
Hend eus denn entschide das mer wiiter nach Jakarta wennd wel eusi Meditation bald afangt und mer kei Stress woend ha bevor mer dete sind.
Also in Bus und ab mach Bukkittinggi wo mer eus denn 2 Tickets nach Jakarta fuer dae nochsch Morge kauft haend. Leider hend mer erscht im nachhinenin gmerkt, das Bukkitinggi eigentlich na es cools Staedli mit recht laebe waeri und so haets eus denn fascht chli agschisse scho wieder am noegschte Morge z gha.

D Busfahrt nach Jakarta isch meh muehsam gsi als suesch was. 41h imene Bus inehocke und all 6h haltet der wieder mal amere Padang-Food Raschtstaett ah. Hett ja scho oeppis gesse..aber das isch echt immer under aller Sau gsi wie das gschmoeckt und usgseh haet. Da isch der de Hunger jedesmal gad wieder vergange. Und so hend mer eus denn halt vo Suessem Brot und Chips ernahert.
De Bus selber isch eigentlich gedige gsi. Haesch huere viel Platz gha bi de Bei und au d Luet sind easy gsi. Numme mit de Klimaalage hends es noed so..oder ebe doch..si chueled de Seich scho fascht uf Minustemperature abe.
Sind denn aber doch na in Jakarta acho..wieder irgendwie am Morge am 5i wie scho z Padang und hend eus denn es Hostel gsuecht wo mer choend bliibe.

ja so… das isch mal em Toby sin Part gsi. Fuer de rescht isch d French verantwortlich.

*huestel* *huestel* …  mue uuunbedingt zum Toby siin Part na was dezuefuege…

– Fahrt Bukidingi nach Jakarta- wie obe scho erwaehnt, hemmer ja jedi 6h aahghalte anere Padangfood-Raststaett.  Das muemmer sich so vorstelle, me chund doet ah, stiegt uus… e meeeeeeeega hitz, rund um eus jensti moslimischi Manne wo giierig, aber doch i ihrne Auge cool a ihrne Zigarette ziehend und nur Fraue mit Chopftuech…zmitzt drinn mir 2 und 100% die einzige Touris. Me wird eifach nu aagstarrt und zwar seeeehr intensiv. Die einte sind drinne am esse, die andere dusse und machet eifach e riiese sauerei. Me cha fasch meine die fuehlet sich wohl i ihrem dreck, will i jedem, aber wueki i jedem Restaurant hets huere dreckig usgseh. Das isch au immer dGlegeheit gsii zum ufs WC gah… aber tataaaaa… au das… wieder e Herusforderig – ja, natuerlich nur Plumskloo 😀 Ha denn mal die Fraue beobachtet und die hend wueki jedesmal bim aahalte scho fasch es Waschritual gha. Zerst gaht mer mal ufs schoene Plumskloo und denn fangt die ganz Waschaktion aah. Het vor de WC so riiesigi Bruenneli, wueki riiesig mit sehr dreckigem Wasser. Doch die Fraue putzed doet ihri Fuess… nei nehmet scho fasch es Bad… und ja… trinket genuesslich vo dem dreckige Wasser… bi nu doet gstande… waaaaaaeeee!!!! Aber bin sicher, die hend au vo mir denkt, leck isch die Frau e Sau, da ich nach miine Pipi-Session uf de Plumskloo’s nie mini Fuess ga waesche bin 😉

Jakarta… mir choend beidi noed verstah wieso alli die vielsiitigi Stadt wennd umgah. Vo uebermodernisiert (s het sogar es Iichaufzentrum mitere Rutschbahn wo vom Oberste Stock in Understeh gaht) bis ultratraditionell… me findet alles. Me fahrt mitem Taxi uf de Strass, luegt rechts hets es riiese Hochhus us Glas, miteme schoene grosse Trottoir und allem Schnickschnack… luegt links, xeht die alte Luet vor ihrne Huesli hocke, vornedrah so Essensstaend Waegeli (Warung) womer echt denkt bi dene isch dZiit wueki stahbliiebe. Als Touris het mer die Wahl wie mer Jakarta wott erlebe – als extremi-moslimischi-hinderem-mond-bliebeni  Stadt wo d Luet sich a alti Traditione haltet und en Touri fuer sie die Oberattraktion isch – oder als uebermodernisierti, a la Singapore Stadt, wo mer die schoenste Chleiderlaede het, die hippste und edleste Restaurants, geschweige denn vo Clubs,  wo dresscode hend, mit Luet wo so verwestlicht sind, so dass Plumskloo wahrschindli nidmal i ihrem Wortschatz existiert, dich als sozaege eine vo ihne gsehnd, also noed als mega Exot und mit ihrem Geld nu zu gern agebet. – Ja het fuer jede was – mir hend beides gseh, und eus gfallt definitiv s alttraditionelle besser, obwohl d Luet vielmals eim zviel werdet, wills wueki, no plan vom Lebe hend. Und s schoene a de gelasseni Siite vo Jakarta, s het Luet, wo afanget ihri Auge oeffne, sprich sich vo de moslimische Religion nuemme so beiflusse loend und aafanget ihres Lebe lebe und noed nachmne Ideal vonere Religion.

Am afang simmer mal 5 Taegli in Jakarta bliebe, ade Jl. Jaksa, doet wos die billigste Unterkuenft het und doet, wos die wenige backpacker aneverschlaht. Was mer i dene 5 Taeg gmacht hend…. ???? kein Plan meh, mi sind eigendli numme umegammlet und sind so wimmer au soett mitem flow mitgfloge. Das chliine Quartierli wo mir gwohnt hend wird au als Kuenstlerzentrum vo Jakarta gnennt. Het viel Buecherlaedeli und vieli chlini Bars und Cafes… alles kompakt anere chline Strass. Me lernt au sehr schnell die Iiheimische wo doet wohnet kenne und fuehlt sich doet sehr schnell wohl und scho fasch biz dehei. Am einte Abig simmer denn na in beruehmte Club Stadium. Isch Weltwiit bekannt fuer d Musik (lauft de beschti Techno) juhuuu han ich froid gha :p und fuer die usserordentlichi Oeffnigsziit – oeffnet am Fritig Abig und het durchgehend offe bis am Mentig Morge und ja, s het immer Luet, sind mal am Sunntig Nammitag, nachdem mer uusgschlafe hend namal in Club (so a la, eh was machemer huet am Sunntig Nammittag? – Ja eh, goemmer in Usgang hihi) und d Party isch na im volle Gang gsii. s Stadium isch riiesig, 4 Stoeck und im oberste isch de Hauptfloor wo namal 2 Stoeckig isch. Het den gad au en DJ us Duetschland uufgleit (Sebastian Krieg). – Und namal e ganz anderi Siite vo Indonesie doet inne, chammer noed beschriebe, muemmer erlebt ha!

Am 13. Oktober simmer denn mitem Zug nach Bogor, die Stadt wo 300 mal im Jahr regnet. Und den gad wiiter richtig Meditationscenter, ca. 1 Stund vo Bogor ide Berge. Doet obe aacho, e wunderschoeni Vegetation und Ussicht is wiite. Zude Meditation wemmer eigendli noed viel sege, hends nach 3 Taeg abbroche, isch zu Sektemaessig gsii. S meditiere selber, het aber trotzdem au nach 3 Taeg, sehr viel inneri Ruhe und balance bracht. Sodass womer denn wieder in Bogor aacho sind, wieder voellig ide Realitaet mit jenste Verchehr uf de Strasse und es huere rambazamba um eus, das eus i keinsti Art und Wiis het choene stresse, wueki so e klarheit mit em Innere a dem Abig hemmer glaubs beidi na nie i somne Usmass gha. Doet hemmer e herzigi Pension gfunde und sind gad 2 Naecht bliiebe. – Aber Bogor stinkt, wueki nued schoens, au de beruehmt Botanisch Garden isch eifach nu mit Dreck ueberlaufe, so schad. Die ganz Stadt lebt nu im stress. Drum hend mer gfunde schnell wieder weg.

Am Morge am 9i hemmer den en Minibus charteret richtig Cibodas, will mir glese hend das doet es sehr ruhigs Doerfli isch ide Berge. Hend denkt ja- genau das womer jetzt bruuchet. In Cibodas aacho is eifach nur leer gsii, scho fasch e Geisterstadt. Alli Hostels leer und jensti Wismas (Guesthouse) zue, will eifach nur am Weekend was lauft doet. Mir hend denn gfunde, nei nei nei… toooo much, sehr komisch da. Also ab nach Cianjur. Igend sonen Joggel wo eus en Jungeltrip het welle verchaufe (het uusgseh wenen indonesische Indianerverschnitt) het eus den gseit me soellet nach Cianjur, doet hets a lot of nice Hotels. Ok. In Cianjur aacho siimer zerst mal was ga esse und natuerli doet chlaebe bliebe, bis au wieder dunkel gsii isch. Zum es Hotel finde simmer is sogenannte Zentrum. Aber au doet, wiit und breit keis Hotel, fasch Menscheleer und eifach nix. Guet was machemer jetzt. Noechsti Ziil waeri Bandung. Gesagt Getan! Mitem Nachtbuus simmer den nach Bandung (nur namal 2 Stund fahrt). Endli!!! ZIVILISATION!!!! Guet, am Abig am 10i hemmer den es Hotel gha, 2 Staedt wiiter als geplant.

Bandung isch easy, aber au noed de wahnsinn, sind denn au doet nach 2 Naecht zrugg nach Jakarta mitem Zug.

In Jakarta simmer wieder laenger bliebe, will mir na de Flug Jak-Sing-Jak gha hend fuer es nues Visum am 26. Oktober. Hend na die restliche Tage in Jakarta gnosse, de Toby het sich na es Tattoo gmacht und sind am 29. Oktober nach Yogyakarta gfahre wo mir au huet na sind.

Foti Update: Singapore bis Jakarta